بقلم شاعرة الشمال ميعاد بنت عقلا البراهيم
( الجوف)

 

الغياب الي تركني بين صفحات الحنين
والحنين الي خذلني في مواعيد السمر
ماني انثى بالزمن تمضي مرور العابرين
بالقصايد والرسايل.. بالخواطر والصور
المكان الي اجي له في جمود الحاضرين
ارحل وتبقى صورتي في خيال الي حضر
المشاعر ماهي لعبه لو غدينا ضايعين
احسب حساب الثواني في غيابك لو تمر
لو تقول الحب أعمى قلت بعيوني يزين
ولو تقول العمر غالي قلت فدوه هالعمر
لو تمناني ضلوعك جيت اسابق هالسنين
اكسر جدار الأماني واسكن ضلوعك دهر
لاتقول شلون أحبك وانت سيد العارفين
تدري اني لانويت اعشق يحركني النظر
احترامك لي يصدّك عن جنون العاشقين
اتزانك بالمشاعر~ حط لشموخي قدر
ياغلى اشيائي الثمينه .. يا أمان اللاجئين
خوفي ، وبردي ، وشقاي ، والغرام المُنتظر
ياول احساسن عرفني دون كل السائلين
وآخر احساسن سكنّي وماسكن بعده بشر
بك عتقت جروح عمري والمدامع والانين
فيك كبلت المواجع واستلذيت السهر
لا تخليني دخيلك يوم جيتك ..( باليمين )
تحفظ عهود اجمعتنا من سكاكين الغدر
اي نعم الله خلقني في عيون الحالمين~
هيبتن ما تنحني~ مهما يطوقها القهر
كلني فدوة جروحك بس عطني حاجتين
الكرامه، والامان احتاجهم بالمختصر
وان لمحت دموع عيني لاتحسبني حزين
قولها محبوبتي تبكي مكاتيب القدر