صدى نيوز إس 2
الشــاعر طيـــــور احمــد
لوكان جيت تعرف ناس الملحون
تحشم لا تقول انايا شاعر
وين بان خاتمك في ثروت قارون
شد على لجامك عودك يعثر
لوكان جا الشعر بإسم القانون
لا انا لا نتا يسمحلك تهدر
لكن جاء مخلط سوقه معفون
مافرزنا السالك ملي باير
لا بيع لا شرا لا نيت عربون
لاخاوي مسلم للي عامر
لا شيخ لا ڨنادز تطبع ذا اللون
لاغاشي بكثرة لينا يحضر
عير حنا ثلاثة ويجي حسون
ولا اللي تقدم واللي يصور
صبحنا اليوم ذكرى كي عام البون
خلا مقامنا منا وتهجر
دخلو ناس ليها بغنا مجنون
مدعوم كل جيها ليه توفر
وذاك الكلام والقول اللي موزون
حطو عليه صخرة ماتتكور
هاذو بناو خيمة تحت القيطون
سموها عطيني فمك نهدر
فرحانين بيها يحسن العون
اللي يصيب خير من اللي يحفر
بيا وبيك نالو هاذ العرجون
تدي الفايدة وتولي خاسر
صدى نيوز اس 1
){kind=link}
