الشاعر عباس محمد بن بلال 

ياراكب فوڨ ابهيم لا اتصم وطرطڨ وذنيك

الفارس والكلمة والقوافي والعود اتوام

دلي ذوك الكرعين كرهم ركبة واتواتيك

فوڨه زاهي تربع ما عبيتش حافي لڨدام

لاتسمع من مدحوك صفڨولك وابناو عليك

ضحكولك كي دلوك بير ماسي مليان احمام

لاتطمع يا شاهي اتسرج العود ويرضى بيك

عندك تحسب يرجاك يا تل واتولي ندام

العارف قدر اشيوخ فالمجالس عدوه اشريك

من لا قدر لقطاب ما اتفرسن ماشد الجام

تعرف مدلول القول من اكلام اللي مور فيك

الفاهم من كلمة اقرى الخافي وارفع لعلام

فرز فن المفتول والمزرد تروى عينيك

وافهم بلاك اتحس تعرف اليڨضة ما المنام

يا جاهل طب الڨول يجبر الخاطر وايداويك

و العارف سر الليل فرز الراجح في لنظام

يا لابس ڨد الناس ما ايجي عبرك غير اخطيك

لفصالة عند اشيوخ راسية فالفن ولنغام

كي تصغاها لفحول في اوزان الكلمة تكويك

لذتها تسمى بيك والعقل يبرى من لسقام

رسي واتماهل زين كلش اتشوفه بين ايديك

واتصنت كانش ما الفايدة تمشي بيها عام

ماني قاصد ذا القول ليك ياسامع ولا ليك

كلمة جات على البال قلتها و الباقي تخمام

لا تتلبط عڨبة اتبركك تزحف من رجليك

ساعف ووزن جهدك لا اتسير في بر اوهام

الصافي نبع العين والصفى ياعاقل يكفيك

والراهن ماهو لون يوم سوڨ ولا جاب اسوام

لمصيل في لعباد يوم شدة راه امساميك

والرادي فالحزة ايعكلك وايخبل لڨيام

ماعادت للصحبة اصحاب توفى كي والديك

من صاحبهم في ذي وذيك سالك ماشاف اظلام

ماعاد الحال احوال كلش اتحول وامجافبك

لا بنة فا العيشة صامطة وامرارت ليام

لعجب ماعاد اعجب شايف وسامع ما يبليك

لحيا مات ودفنوه والحلال امرافڨ الحرام

ياسامع كان الڨيت ذا الكلام امظلم واحليك

ولا معناه اشكيل دلني ياصاحب لمقام

كي نقرى شي مرات للقصيد المحبوك احبيك

يهمل عقلي وايجول في ابرور امتلف لرسام

ياڨلبي نا مليت من احكامك ربي يهديك

خليك من تفتاش عفني نهنى ولا النام

كي تنبش في الماضي اتهوض امحاني وانڨسيك

خلينا نتصافاو هودت ما باقي تخمام

الطمعة فالجواد خالقي والحي المليك

يشملنا بالرحمة ايزين الرحلة في الختام

صلي ياربي على الهادي طه نبيك

واحشرنا ياربي امعاه سيدي خير الانام