مش اوضة الفئران ….لاء

ولا الاوضة اللي كانوا بيخوفوا بيها العيال الصغيرة زمان …

الاوضة الضلمة دي مكان موجود عند كل واحد فينا في دماغه ،

بيرمي فيها كل حاجه وحشه عدت عليه في حياته ..

كل ذكري سيئة ..

كل المواقف الصعبه اللي ماقدرش لا يستوعبها أو يتخطاها ..

كل لحظة مرة صادفته وما كنش عامل حسابها أو كان قادر علي تحملها …..

الاوضة دي ما بنحبش نفتحها ولا وحتي عايزين نفتكر ايه اللي متخزن فيها ،

وممكن تلاقي مش بس فيها احداث ، لا دي فيها كمان أشخاص اتنسوا وبقوا مجرد ذكريات حبيسة جوة الاوضة المقفولة …

مرورهم في حياتنا كان درس ومش اي درس كان درس قاسي أو اختيار خاطئ ومش مناسب ،

و زي ما بنقول كده اوضة ،،،، الكرااااااااااكيب ،،،،

انا بقا قررت اتخلص من كل الكراكيب

وافتح الاوضة الضلمة أو بمعني اصح الكراكيب اللي جوة دماغي أخرجها للورق ،

ويا أما اكتبها أو اتبرع بيها لبتاع الروبابكيا او ارميها في اقرب سلة للمهملات

دي مش مجرد فكرة عابرة أو فضفضة ،،،،

دي فكرة علمية صحيحة جدا

نقدر بعدها نحيا حياة جديدة من غير اوض ضلمة أو مشاعر جوانا سلبية

أو مخزون سيئ بداخلنا أو ضغوط نفسية ..

تخلصوا من الاوضة وافتحوها وافتحوا الشبابيك فيها وابدأو حياة جديدة من غير ضلمة

دكتورة لبني يونس