خضران الزهراني
اعاتبك علي إيه ولا ايه
واوجع دماغي معاك ليه
مادام الكلام نفس الكلام
و اللي بنقوله النهاردة قولناه كتير زمان ،،،،
واعاتب ليه مدام مش لاقيه فيك تغيير وانت استاذ واسطي في التبرير ،
وقادر علي القسوة و الخصام وعامل فيها كبير ،
ودايما انا اللي مش عاقلة و دماغي فاضية و مش سائله
انا القاسية اللي عملت في الحياة ناقلة
وقلبت صفوها و كمان عكرتها
ودايما شايفني من غير ميزة وساعات رغاية و مجنونة وفوق كدة عنيدة
وبصراحة وشهادة لله انت قادر بسهولة تقلب الموازيين وتقلب كمان الترابيزة
اعاتب ليه و طول الوقت انا الجاني وانت ياعيني ويا حرام بتعاني
اعاتب ليه
ما خلاص خلصت ،خليني بعيد احلي
انا مليت اصل العيشة معاك مش سهلة
وللعتاب مش مستهلة
وياما قولتلك اني محتاجه ايدين تسندني في الرحلة
كان ناقصني معاك اتحب و مشاعر تانية صعب اعديها ،
ناقصني حب ومودة وحاجات مش عارفه اخبيها ،
حاجات صعب العتاب فيها
جاي دلوقت ،
تقولي أن مشاعرك كنت مداريها وعني مخبيها،
سامحني بجد فات الوقت.
خاطرة
دكتورة لبني يونس
سلمي
