صدى نيوز إس 2
الشاعـــــر أحمد طيـــــور
وطني وطني معزتك ماليها حد
وحبك مغروس وين مغروس ايماني
في كل نهار ليك حبي يتجدد
ذا ميثاق غليظ بينك وبيني
وطن النخوة والعدو لينا يشهد
والتاريخ اللي محرك وجداني
من عطفك لجراح لينا تتكمد
وفي سرك ايات تخفى ومعاني
لمقامك ماهوش من والا يصعد
متهول ماهوش مطرح للهاني
مدحور عدوك في صباعه يكدد
طامع مغرور في حلامه متمني
من اجلك مليون ونص استشهد
من عهد الامير حتى المقراني
هاذاك الجيل محصيناله عدد
وفطيمة وبطال بوبغلة ثاني
وزيد الشيخ بوعمامة لا تجحد
ذو اهل الجنوب مافيهم دوني
يجعلهم للكل في جنة الخلد
وجميع اللي ما ذكرته بلساني
والجيش اللي راه ضروك متواجد
في جوك وحدادتك والمواني
حفظهم يا الله من عين الحاسد
وهزم اعداء الوطن والنصراني
قهرنا من جا علينا يتمرد
وقهرنا من جا يعلي ويدني
وقهرنا من كان لازم ليه الرد
شاف الساعة قايمة في ثواني
حنا قوة مرحبا بلي قاصد
عدو وصديق بين ذاك وذا نبني
لينا موقف قولنا ما يتعاود
وكلمتنا ماهيش نكت ومعاني
اخت البارود جاو من مدفع واحد
وحتى العدو قال ثقبتلي وذني
الجزائر في حضنها شعب موحد
صامد ماخان ماركع ماينحني
شعر شعبي جزائري
صدى نيوز اس 1
