ضربتها !!!

ضربتها !!!
عايز تحس انك اقوي منها ،
عايز تشوف انكسارها وذلها ،
عايزها تشوف قوتك وتحس ضعفها ،

كان نفسها تشوفك سندها ،
كان نفسها تشوفك امانها ،

الرسول وصاك عليها ،
وقالك خلي بالك منها ،
جيت للدنيا من رحمها ،
وانت حته منها ،

قوتك في حمايتها ،
مش في كسرة قلبها،
خلقها رب العزة من ضلعك عشان تخاف عليها وتحبها ،

انت ابوها وأخوها وابنها ،
هي حبيبتك وشريكة عمرك
وشجرة نمت في ضلها ،

ارض خصبة خدت خيرها و شبابها و عمرها
هي القوية العفية لما تعبت من الدنيا
جريت عليها ،
اترميت في حضنها ،
أيدها عليك طبطبت وانت بأيدك ضربتها ،

مديت ايدك عليها ،
وشفت دمعها ،
شفت وجع قلبها ،
ازاي نسيت في لحظة غضب حلوها ،
ازاي فضلت عليها
اللي في حبهم ليك أقل منها ،

كنت حمايتها وضهرها ،
خلتها خافت منك واتسندت علي حيطه تحميها وتضمها ،
ظلمت نفسك وظلمتها ،
نزلت من عنيها ،
وخرجت من قلبها ،

لما فكرت ترفع ايدك عليها
وضربتها

دكتورة لبنى يونس