الشاعر الجزائري البار البار

 

علِّــــي يا لعلام في دولة لحرار

علّاوَك لبطال ذريــــة لاميـــــــر

علِّـي .. زيد عْلا و كويهم بالنار

مكرة في لعدا من دولة قمير

رفرف فالفضا طير مـــع لطيار

و اضوي علكوان مثل البدر تنير

رفرف بالسلام و القســـم أوتار

يرجف ليك الكون مـن عند القدير

مــن رفعك فيداي يزدم لا توخار

جندي من لشراف في جيش التحرير

في لبيض سلام ضد ذيول العار

مــــن ظنو هَبّاتنا موحال تصير

في لخضر خيرات رمز الٱزدهار

أرض بلادي كنــز مليانة بالخير

لحمر دم ن ساح مالشعب لي ثار

حـــــيَّ علجهاد مـــا فيها توخير

حوم فوڨ ربوعنا منــك تخضار

و اطلع حد الشمس باه النجم ينير

و اسطع يا لهلال دير الليل نهار

لُمَّـة تترجاك بعــــــد زمان عسير

عَلَــم مـــا يصفاك لو بجناحو طار

كي يسمع بخصايلك موحال يطير

مثلك فالشموخ كــي نخــل الذكار

لا هبـــــــت لرياح يتشامخ لكبير

مثلك ضَيٍ صباح طل مع لفجار

عم الكون ضياه باه الخلق تسير

نورك شـــع و عـــاد قدوة للثوار

مـن ضحو بنفوسهم لجل التحرير

من شافك يهواك من عقلو يحتار

تاربخك معروف صنعوه جبابيـر

و لًي جا من هيه ليك حسابو دار

يعطيلك سلام تعظيم و تكبيـــر

كثرولـك لحباب كثرولــك لنصار

و لـــي حـب ينافسك خاين حقير

ربــــي يا إله واحـــد يا قهـــــار

احفظ ذا لعلام مــــن مكر التدبير

و بجاه النبــــــي و اصحابو لخيار

زيد علاه علا فــــــي ظل التغيير