عارفين كمال ابن الفنان فريد شوقي في مسلسل البخيل وأنا.. الممثل ده كان أداءه هايل بس مكملش ومعرفناش عنه حاجة لإنه اختفى بشكل مفاجئ بعد المسلسل.. بس يا ترى هو مين وايه حكايته بالظبط..
في الحقيقة الممثل ده مش مصري هو فنان سعودي.. واسمه بكر الشدي ورغم نجاحه الكبير في المسلسل وكمان إتقانه للهجة المصرية، إلا إنه مكملش ورجع على السعودية ونهايته كانت حزينة جداً ورحل في عز شبابه
اسمه بالكامل بكر إبراهيم صالح الشدي لعائلة من أهم وأعرق العائلات في السعودية اللي أصولها بترجع لقبيلة بني خالد الشهيرة بعراقة تاريخها وأصالتها في المملكة.
وفي بداية السبعينات شارك بدور صغير جدا في فيلم امباراطورية ميم مع فاتن حمامة وأتقن اللهجة المصرية بالرغم إن سنه وقتها كان 13 سنة بس..
ارتبط بكر بعلاقة صداقة كبيرة مع محمد صبحي، وكان مصمم إنه يشارك في الدراما المصرية بعمل كبير، ومن حسن حظه إنه شارك سنة 1985 في الجزء الخامس من مسلسل محمد رسول الله بدور عمار بن ياسر.. وكل النقاد والجماهير أشادوا بدوره وإتقانه للغة العربية الفصحي.
حصل بكر على شهادة الدكتوارة من جامعة أوهايو الأمريكية وبعدها حصل على شهادة الدكتوارة في الأدب بدرجة امتياز من جامعة درم في بريطانيا سنة 1988، وبقى أول ممثل سعودي وخليجي يحصل علي الدكتوراه. بعد كده ارتبط بكر بفتاة سعودية اسمها لطيفة المشاري وأنجب منها 3 أولاد وهما فيصل والمعتز والمها.
بعدها حن بكر من جديد للدراما المصرية والمرة دي كان في قمة سعادته لإنه هيشارك فريد شوقي في مسلسل البخيل وأنا اللي اتعرض سنة 1991 ، وقام بدور كمال إبنه والحقيقة إن المسلسل نجح نجاح ساحق وكل الجماهير المصرية أشادت بدور كمال وكانوا فاكرينه وجه جديد.. وبدأوا يسألوا عن سبب اختفاءه بعد عرض المسلسل.. وخصوصا إن مكنش في أيامها سوشيال ميديا.
ومر بكر الشدي بوعكة صحية خلته طريح الفراش وبعد كده اكتشف الأطباء إنه أصيب بالداء الخبيث في المخ واستمر في معاناة لمدة سنتين كاملين.. ورحل عن دنيتنا سنة 2003 في عز شبابه اللي كان يادوب 44 سنة ودفن في مقبرة النسيم في الرياض.
رحم الله أبو فيصل رحم الله الفنان بكر الشدي وأسكنه فسيح جناته
